Konsultimet për caktimin e datës së zgjedhjeve lokale – partitë politike sot takohen me presidenten Osmani
Presidentja e Kosovës, Vjosa Osmani do të nis sot konsultimet me partitë politike për caktimin e datës së zgjedhjeve lokale.
Takimet me subjektet politike do të mbahen në Presidencë nga ora 14:00, ndërsa ftesat për pjesëmarrje u janë dërguar të gjitha partive parlamentare.
Këshilltari për media i presidentes, Bekim Kupina, konfirmoi se “në bazë të kompetencave kushtetuese, Presidentja Osmani ka ftuar subjektet politike në takim më 4 qershor për konsultime për caktimin e datës së zgjedhjeve lokale. Menjëherë pas përfundimit të konsultimeve, presidentja do të caktojë datën zyrtare të zgjedhjeve.”
Pjesëmarrjen në këto takime e kanë konfirmuar tashmë Lëvizja Vetëvendosje, Lidhja Demokratike e Kosovës dhe Aleanca për Ardhmërinë e Kosovës.
Zëdhënësi i LVV-së, Arlind Manuxhka, ka thënë se kanë pranuar ftesën dhe do të marrin pjesë në takim, ndërsa nga LDK-ja, zëdhënësi Besian Mustafa ka bërë të ditur se takimi është caktuar për sot në orën 14:00.
AAK-ja gjithashtu ka konfirmuar pjesëmarrjen, duke bërë të ditur se në takim do të jetë i pranishëm edhe kryetari Ramush Haradinaj.
Subjektet politike kanë filluar tashmë përgatitjet për zgjedhjet lokale, duke konfirmuar disa nga kandidatët nëpër komuna.
