MKRS demanton lajmet për kinse pezullimin e procedurave të prokurimit për projektin e Stadiumit të Gjilanit
MKRS demanton lajmet për kinse pezullimin e procedurave të prokurimit për projektin e ndërtimit dhe rinovimit të Stadiumit të Gjilanit.
Në një sqarim publik, MKRS ka demantuar këto lajme duke qartësuar se tashmë ka përfunduar vlerësimin e ofertave dhe ka dalë me rezultat për rekomantdimin e fituesit të kontratës.
Në vijim mund të lexoni sqarimin e plotë të MKRS-së, të publikuar në faqen e saj zyrtare në rrjete sociale.
Sqarim publik
Procedura e prokurimit për ndërtimin e stadiumit të Gjilanit, nuk është pezulluar.
Njoftojmë opinionin publik, mediat dhe gazetarët e interesuar se raportimi për pezullimin e tërësishëm të procedurës së prokurimit për ndërtimin e stadiumit të Gjilanit, nuk është i saktë!
MKRS ka përfunduar vlerësimin e ofertave dhe ka dalë me rezultat për rekomandimin e fituesit të kontratës. Ligji parasheh se palët që marrin pjesë në tender, kanë afatet e tyre të paraqitjes së kërkesave për rishqyrtim kur ka mospajtime nga ana e tyre lidhur me rezultatin.
Në këtë rast, meqenëse kemi së paku dy kërkesa për rishqyrtim, afatet e procedurës, pra jo procedura në tërësi, pezullohen deri në shqyrtim dhe vendosje mbi këto kërkesa. Ky afat pritet të përmbyllet brenda 5 ditësh, dhe më pas vazhdohet me fazat tjera, deri në nënshkrimin e kontratës dhe fillimin e punimeve.
