Program festiv për nder të 17 shkurtit nga nxënësit e gjimnazit natyror “Xhavit Ahmeti”
Nxënësit e gjimnazit natyror “Xhavit Ahmeti”, kanë realizuar program festiv, për nder të 17 shkurtit – Ditës së Pavarësisë së Republikës së Kosovës.
Në këtë aktivitet ishte edhe nënkryetarja e Komunës së Gjilanit Leonora Morina Bunjaku, bashkë me drejtorin për Arsim Shpend Nuhiun.
Nënkryetarja Morina Bunjaku, tha se ndihet falënderuese për ftesën që i kanë bërë për të marrë pjesë në programin e festës së pavarësisë, organizuar nga nxënësit e gjimnazit.
“Në këtë ditë të shënuar, bashkohemi për të kremtuar një moment historik per vendin tonë – Ditën e Pavarësisë së Kosovës. Kjo është një ditë e mbushur me krenari, gëzim dhe përkushtim ndaj atdheut, një ditë që na kujton se çfarë arritje të mëdha kemi bërë dhe sa shumë kemi sakrifikuar për ta arritur këtë liri të shenjtë”, tha Morina Bunjaku.
Nënkryetarja e Gjilanit, shtoi se Dita e 17 shkurtit na kujton procesin e gjatë e të mundimshëm të luftës për pavarësi, që ka nisur me shpresën dhe ëndrrat e popullit tonë dhe që ka kulmuar me shpalljen e Pavarësisë. Ajo është rezultat i sakrificës dhe guximit të shumë brezave që luftuan për lirinë, dinjitetin dhe të ardhmen e Kosovës.
“Sot, e kujtojmë çdo individ që ka kontribuar në këtë betejë – nga ata që luftuan në terren, ata që ofruan mbështetje politike dhe diplomatike, e deri te ata që dhanë jetën për këtë ditë të shenjtë. Ne krenohemi me ta dhe nuk do ta harrojmë kurrë sakrificën e tyre. Pavarësia është një arritje e madhe, por ajo është gjithashtu një detyrë. Ne, si popull, duhet të vazhdojmë të punojmë për të forcuar shtetin tonë, për të ndërtuar institucione të qëndrueshme dhe për të krijuar një të ardhme më të mirë për gjeneratat që do të vijnë”, tha Bunjaku.
Nënkryetarja e komunës shtoi se pavarësia e Kosovës, është një mundësi e madhe për ne, për të dëshmuar se mund të udhëheqim rrugën e zhvillimit dhe integrimit në familjen ndërkombëtare, duke ruajtur dhe forcuar identitetin tonë. Krenaria jonë për këtë arritje duhet të na udhëheqë në çdo hap, por edhe përgjegjësia jonë ndaj Kosovës është po aq e madhe.
“Ne duhet të vazhdojmë të ndërtojmë një shoqëri të drejtë, të bashkuar dhe të paqes, ku çdo qytetar ka mundësi të barabarta dhe të drejta për të kontribuar dhe jetuar me dinjitet. Në këtë ditë të veçantë, përkujtojmë se Pavarësia e Kosovës është një dhuratë e çmuar, por ajo kërkon përkushtim dhe angazhim të përditshëm”, tha Bunjaku.
Sipas saj të gjithë, pa dallim, duhet të jemi të bashkuar dhe të angazhuar për të mbrojtur këtë pasuri dhe për të kontribuar në zhvillimin e vendit tonë. Kosova është e re, por ka një të kaluar të lavdishme dhe një të ardhme të ndritur.
“Le të festojmë këtë përvjetor me krenari, por gjithashtu me ndjenjën e përgjegjësisë dhe besimin se ne mund të arrijmë gjithçka që dëshirojmë si komb”, tha Nënkryetarja Morina Bunjaku.
Shpend Nuhiu, drejtori i Arsimit, tha se janë mbledhur për të
shënuar njërën nga ditët më të rëndësishme të historisë sonë kombëtare – ditën e 17 Shkurtit, ditën kur Kosova u bë e lirë, e pavarur dhe krenare për sakrificën e brezave të tërë që, punuan, luftuan, sakrifikuan e dhanë jetën për këtë ditë.
Ai kërkoi nga nxënësit që të vazhdojnë të punojnë, të mësojnë dhe të kontribuojnë për një Gjilan e Kosovë që i përgjigjet aspiratave të të gjithë qytetarëve të saj.
