Operacion i madh i antimafias në Palermo, 180 arrestime, mes tyre bosët e Cosa Nostra
Një operacion i madh nga Drejtoria Antimafia e Palermos, ku kanë marrë pjesë mbi 1200 karabinierë, çoi në arrestimin e 181 personave, duke përfshirë edhe bosët nga pika të ndryshme të kryeqytetit sicilian dhe provincës.
Hetimi zbuloi skemën organizative të familjeve kryesore, biznesin e klaneve dhe përpjekjen e Cosa Nostra për të rindërtuar kupolën provinciale dhe për të reaguar ndaj autoriteteve që vitet e fundit kanë çuar në burgosjen e mijëra njerëzve.
Rrethet kryesore të përfshira në hetim janë ato të Santa Maria di Gesù, Porta Nuova, San Lorenzo, Bagheria, Terrasini, Pagliarelli dhe Carini.
Të arrestuarit akuzohen, në shkallë të ndryshme, për organizatë kriminale të tipit mafioz, tentativë vrasje, zhvatje, kryer ose në tentativë, rënduar me metoda mafioze, shoqatë me qëllim trafikimin e paligjshëm të narkotikëve, krime kundër pronës, kundër personit dhe lojëra të paligjshme të fatit.
Hetimet zbuluan sistemin e ri me të cilin u takuan bosët për të riorganizuar komisionin e ri krahinor, tashmë të fshirë një herë me arrestimet në dhjetor 2018.
Bosët e mafias në burg dhe ata ende të lirë kishin në dispozicion karta mikrosim dhe celularë të koduar, të futur ilegalisht në qeli, me të cilat flisnin pa u shqetësuar nga jashtë dhe jepnin urdhra për të tjerët.
Disa nga mafiozët e arrestuar ishin gati të fshiheshin. Kunati i shefit Nunzio Serio, për shembull, pasi gjeti GPS në Smartin e gruas së tij dhe kishte frikë se së shpejti do të dilte për të një urdhër gjyqësor, u largua nga Palermo për të ikur në veri. “Të gjithë jemi duke u bombarduar”, tha ai.
Një tjetër bos mafioz, pasi i shpëtoi ndjekjes së një patrulle të GdF, kishte planifikuar që bashkë me familjen të strehohej jashtë vendit dhe të siguronte pasuritë e grumbulluara nëpërmjet lojërave të fatit online.
“Duhet të iki nga këtu… Duhet të ndërroj vendbanimin… Po largohem…”, tha ai, duke shtuar se Italia na është bërë e pakëndshme.
