Rektori i UKZ-së ka nënshkruar marrëveshjen për Grantin e Komisionit Evropian/Projekti “STEM EUROPE” në vlerë prej 3 milion euro
Rektori i Universitetit Publik “Kadri Zeka” në Gjilan, Prof. Asoc. Dr. Artan Demaku, nënshkroi marrëveshjen për grantin e Komisionit Evropian për implementimin e projektit ERASMUS Lump Sum Grants “STEM EUROPE” në vlerë prej 3 milion euro.
Me nënshkrimin e kësaj marrëveshjeje, Rektori Demaku konfirmoi angazhimin e Universitetit të Kadri Zeka për të ofruar mundësi inovative për studentët dhe stafin, duke pozicionuar UKZ-në si një lider të arsimit profesional në Kosovë dhe rajon.
UKZ është institucioni i vetëm nga rajoni që ka fituar një projekt të këtij niveli. Projekti “STEM EUROPE” do të zbatohet në bashkëpunim me partnerë nga Holanda, Suedia, Gjermania, Italia dhe Turqia. Ky projekt është rezultat i punës së nisur pas takimit të STEM Taskforcës për Ballkanin Perëndimor, i cili u mbajt nga 29-31 tetor 2023 në Dubrovnik, ku u diskutua mundësia e krijimit të një rrjeti të institucioneve të Ballkanit Perëndimor që promovojnë zhvillimin e fushave STEM, në bashkëpunim me Komisionin Evropian, dhe kërkesa që Agjencia Erasmus+ të mbështesë zhvillimin e këtyre fushave.
Dekani i Fakultetit të Shkencave Aplikative në UKZ, Prof. Dr. Xhevdet Thaqi, së bashku me profesorë dhe studentë të programit Master “Sistemet e Kontrollit dhe Inteligjenca Artificiale”, dhe me mbështetje të menaxhmentit të UKZ-së, u angazhuan për këtë projekt, duke realizuar përgatitjet e nevojshme, siç janë themelimi i UKZ STEM Center (https://uni-gjilan.net/fakultetet/fakulteti-i-shkencave-aplikative/stem-center-2/), dhe anëtarësimi i UKZ-së në EU STEM Coalition në nëntor 2023.
EU STEM Coalition është themeluar nga Bashkimi Evropian për të promovuar dhe zhvilluar fushat STEM në arsimin e lartë dhe atë profesional në Evropë. Më shumë informacion mund të gjendet këtu: https://www.stemcoalition.eu/members.
Në bashkëpunim me anëtarët e EU STEM Coalition, përgatitjet për propozimin “STEM EUROPE” filluan menjëherë, dhe në maj 2024, aplikimi i këtij projekti u plotësua dhe u pranua në platformën Erasmus+ Lump Sum Grants. Më 6 nëntor 2024, u publikua vlerësimi i shkëlqyeshëm i projektit nga vlerësuesit e Erasmus+, ndërsa më 6 shkurt 2025, u nënshkrua marrëveshja finale për grantin e projektit, mes partnerëve të projektit dhe Komisionit Evropian.
Një nga komponentët kryesorë të projektit STEM EUROPE është krijimi i gjashtë Qendrave Rajonale të Ekselencës Profesionale (COVE) në Kosovë, Holandë, Gjermani, Suedi, Turqi dhe Itali. Këto qendra, të mbështetura nga platforma STEM COVE EUROPE, do të ofrojnë mundësi bashkëpunimi, avancimi profesional dhe përmirësimi i aftësive për studentët dhe profesionistët e fushave teknike dhe shkencore. Me sfidat e vazhdueshme të BE-së, si mungesa e fuqisë punëtore të kualifikuar dhe mos përputhja e aftësive në treg, STEM EUROPE synon të adresojë këto probleme duke krijuar mundësi të reja për profesionistët e rinj në sektorin e arsimit dhe formimit profesional (EQF 5), pa dallim gjinie, statusi socio-ekonomik apo prejardhjeje.
Ky projekt do të fuqizojë bashkëpunimin ndërkombëtar të universitetit dhe do të ndihmojë në krijimin e një force punëtore të përgatitur për një treg dinamik pune në fushat STEM.
