Vranësira dhe reshje të pakta lokale shiu e bore, temperaturat në ngritje të ndjeshme
Gjatë kësaj jave vendi ynë do të mbetet nën ndikimin e kushteve të paqëndrueshme atmosferike, mirëpo të masave më të ngrohta ajrore me origjinë nga Afrika Veriore.
Si rrjedhojë, dita e hënë u karakterizua me vranësira të nivelit të lartë dhe intervale me diell, ku edhe temperaturat shënuan ngritje të lehtë sado pak, pas vranësirave të ulëta që kishin dominuar pjesën më të madhe të vendit tash e sa ditë.
Të martën, një presion i ulët mbi Detin Mesdhe, do të sjellë shtim të vranësirave si dhe kohë pas kohe reshje të pakta lokale shiu, bore si dhe shi të ngrirë. Nuk përjashtohet mundësia edhe për intervale me diell.
Të mërkurën, pas vranësirave të shpeshta, pasditja do të vijojë me diell dhe vranësira të pakta.
Të enjten parashikohet mot me diell dhe vranësira, ndërsa në orët e mëngjesit mund të ketë mjegull nëpër ultësira dhe lugina.
Dita e premte parashikohet me vranësira dhe intervale me diell, ku pritet të kemi në front të dobët ajror, duke sjellur reshje të pakta lokale shiu.
Sa i përket fundjavës, pritet të karakterizohet me diell dhe vranësira, ndërsa masat e ngrohta pritet të fuqizohen, duke shënuar ngritje të mëtejshme, deri në 12 gradë Celsius maksimalet.
Era do të fryjë drejtimesh të ndryshme, e cila kohë pas kohe pritet të jetë e fuqishme të enjten, konkretisht në regjionin e Gjakovës, me shpejtësi prej 10-41 km/h.
Temperaturat minimale do të lëvizin prej -3 deri në 5°C, ndërsa ato maksimale prej 4 deri në 12°C.
