Rritje e jashtëzakonshme e buxhetit për bujqësi, nga 390 mijë në 1.5 milionë euro
Vazhdon mbështetja dhe kujdesi i komunës për sektorin e bujqësisë dhe fermerët, ku tashmë ka rritje të prodhimeve bujqësore dhe avancim të praktikave të qëndrueshme në bujqësi.
Kryetari i Komunës së Gjilanit, Alban Hyseni, tha se kanë gjetur buxhet vetëm rreth 390 mijë euro më 2021, ndërsa më pas e kanë dyfishuar në 800 mijë euro.
“Drejtoria e Bujqësisë dhe Pylltarisë, duke krahasuar periudhën e punës për vitet 2019-2021 dhe 2021-2024 ka shënuar progres në rritjen e buxhetit e si rezultat dhe rritjet e mbështetjes në forma të ndryshme, për fermerët e gjithashtu dhe rritjen e numrit të përfituesve. Nga viti 2021, ka pasur rritje të jashtëzakonshme të buxhetit të bujqësisë dhe vlera e këtij buxheti vetëm në vitin 2023 ka qenë mbi 1 milion euro”, tha Hyseni.
Kryetari, tregoi se në qeverisjen e tij janë 3140 përfitues të farës së grurit, derisa më të kaluarën ishin 2025 përfitues. Përfitues të farës së misrit janë 1811 persona, e më parë ishin 983. Rrugë fushore janë 24 km, derisa ishin 19 km. Mekanizëm bujqësor janë 122, ishin 70 përfitues. Me drunjtë dekorativ janë mbjellë 1000 fidane, e më parë ishin 870. Përfitues të fidanëve të arrës janë 49. Koshere të bletëve janë 55. Subvencionim me krerë gjedhe janë 156 dhe është bërë trajtimi i 916 qenve endacak.
I pari i Komunës së Gjilanit, tregoi edhe për projektet e reja e që janë subvencionimi i qumështit, ku 23 përfituesë u mbështetën me 22,585.61 euro. Hapja e puseve për ujitje ku 46 veta përfituan 48,000.00 euro. Panele Solare përfituan 30 persona. Furnizim me serra 500m janë 12 përfitues. Furnizim me motokultivator ishin 72 persona në vlerë prej 77,775.00 euro. Furnizim me serra 100m ishin 127 veta në vlerë prej 127,400.00 euro. Projekti mjedra-boronicë janë 29 persona ku përfituan 138,000.00 euro. Dhe furnizim me pula janë 95 përfitues.
“Për herë të parë pas luftës Komuna e Gjilanit, respektivisht Drejtoria e Bujqësisë, ka subvencionuar me pagesë direkte prodhuesit e qumështit në komunën tonë, me vlerë 0.08 cent. Derisa tash do të jetë subvencioni nga 10 centë për litër”, tha Alban Hyseni.
Kryetari i komunës, theksoi se gjithashtu, Drejtoria e Bujqësisë, për herë të parë ka subvencionuar fermerët me panele solare të kapacitetit prej 3.6 Kw.
“Nga 2500 fermerë që kemi kanë përfituar 1500 kanë përfituar Brenda një viti. Më herët ishte subvencioni 1500 euro, ndërsa tash është 5000 mijë euro dhe i’u lejohet që të aplikojnë në disa projekte e jo vetëm në një”, tha kryetari Hyseni.
I pari i Gjilanit, tregoi se këto masa kanë rezultuar në përmirësimin e kushteve për fermerët, rritjen e prodhimit lokal dhe avancimin e praktikave të qëndrueshme në bujqësi, duke kontribuar në zhvillimin e qëndrueshëm.
