Mot i paqëndrueshëm dhe i ftohtë: Shi, borë dhe shqotë, ja si do të karakterizohet kjo javë

Gjatë kësaj jave vendi ynë do të mbetet nën ndikimin e kushteve të paqëndrueshme atmosferike dhe masave të ftohta.

Si rrjedhojë, në mëngjesin e së hënës do të arrijë një ciklon me origjinë nga veriperëndimi i kontinentit, i cili fillimisht parashihet të sjellë reshje të dendura bore në disa pjesë të Rrafshit të Dukagjinit, sidomos në rajonin e Pejës, ndërsa në zonat e tjera pritet të jenë kryesisht në formë të shiut apo edhe shqotës. Në mbrëmje reshjet pritet të pushojnë në pjesën dërrmuese të vendit.

Nga dita e martë e deri të premten, do të vazhdojë moti i vranët, i cili kohë pas kohe do të karakterizohet edhe me reshje të pakta shiu, shqote e bore.

Era do të fryjë kryesisht nga drejtimi i veriut në pjesën më të madhe të kohës, ndërsa përjashtim bën dita e sotme, kur do të mbizotërojë era nga juglindja. Gjatë javës, herë pas here do të jetë e fuqishme, me shpejtësi prej 15-60 km/h.

Temperaturat minimale do të lëvizin prej -5 deri në 1°C, ndërsa ato maksimale prej 1 deri në 6°C. /MeteoKosova/