Në Vali Ranch & Congress Center, në objektin luksoz të Sun Garden është prezantuar projekti i ri i Shkollës “Hello Academy”
Në Vali Ranch and Congress Center, në objektin luksoz të Sun Garden, është prezantuar projekti i ri i Shkollës “Hello”, e cila tash e pesëmbëdhjetë vite vepron në Gjilan.
Fillimisht, Hysnije Kurteshi, drejtoreshë e kësaj shkolle, ka theksuar se ishte viti 2010 kur për herë të parë u hap Kopshti Privat për fëmijë e më pas në rritën e saj më 2013 është ndërtuar objekti i ri, ku u rritën kapacitetet dhe në të u regjistruan 70 fëmijë.
Më pas kapacitetet u rritën në 120 fëmijë me objektin e ri më 2015 e në vitin 2021 u zgjerua pjesa e kopshtit. Në vitin 2017 u krijuan kushtet për hapjen e shkollës 1 deri në 6, andaj më 2018 u investua në objektin e Fabrikës së Tekstilit, për t’u shtuar numri i nxënësve deri në 689.
Në këtë shkollë u hapën edhe kabinete, objekte përcjellëse dhe gjithçka që mundësoi lidhjen e praktikës me teorinë, ka thënë drejtoresha Kurteshi, e cila më pas foli edhe për aktivitetet jashtëshkollore, duke shtuar se në vitet në vazhdim shkolla do të rritet edhe më shumë.
I pranishëm në këtë ngjarje, ka folur edhe Alban Hyseni, kryetar i Gjilanit, i cili ka theksuar se kjo shkollë që ka të punësuar 112 mësimdhënës ka arritur suksese të mëdha, andaj ai është shprehur i lumtur që Gjilanit po i shtohet edhe një investim i ri dhe me vlerë që krijon kuadro për të ardhmen.
Florijan Kurteshi, drejtor në Shkollën “Hello”, ka theksuar se tashti janë në proces të projektit të radhës dhe tashmë shumë nga punët janë kryer në objektin në periferi të qytetit, i cili do të jetë më i qasshëm për nxënës dhe prindër, shkollë me qasje ftuese për nxënës, ekologjike, me dritare me lartësi të mëdha, në të cilën të gjitha hapësirat janë të ndërlidhura si duhet që e bëjnë atë një ndër shkollat më moderne në rajon.
Sipas Florijan Kurteshit, objekti do të jetë në një objekt të gjelbëruar, me 6800 metra katrorë hapësirë të brendshme, me pesë hyrje e po aq dalje, me dy hyrje dhe dy dalje për fëmijët e çerdhes me klasa, kabinete, fusha të sporteve, me pishina të formateve të ndryshme dhe tejet moderne ku është shfrytëzuar edhe pjesa e sipërme dhe shumë risi të tjera, për të cilat lakmi do t’ia kishin shumë shkolla jo vetëm në rajon, por edhe më gjerë.
Ndryshe në këtë ngjarje të mbajtur në Vali Ranch and Congress Center, në objektin luksoz të Sun Garden kanë qenë pjesëmarrës qindra mësimdhënës, drejtorë shkollash, struktura udhëheqëse, prindër dhe mysafirë të tjerë.
