Elhaida Dani, zgjidhet drejtore artistike e Festivalit të Këngës në RTSH
Lajmin e ka bërë publik përmes rrjeteve sociale vet këngëtarja, e cila ka premtuar risi të mëdha në strukturimin dhe organizimin e festivalit, krahas përfshirjes së stafit të saj që ka paralajmëruar se do të jenë profesionistët më të mirtë që ka Shqipëria.
“Eh po!
Me gëzim dhe krenari, më në fund njoftoj se kam marrë rolin e ri si Drejtoresha Artistike e ‘Festivalit të Këngës në RTSH’”, shkroi fillimisht ajo.
“Ky festival ka një rëndësi të madhe për mua si dhe për gjithë shqiptarët, sepse unë jam rritur në atë skenë dhe e di sa e veçantë është për ne të gjithë. Të jesh pjesë e këtij eventi madhështor është një privilegj dhe një përgjegjësi e madhe që e marr me shumë seriozitet”, potencoi në vijim Elhaida Dani.
“Patjetër, nuk do jem vetëm por do kem ekipim tim të profesionistëve më të mirë në Shqipëri, të cilët do i bëjmë të ditur në ditët në vazhdim. Do të jemi shumë rigorozë në të gjitha fazat e punës për të siguruar që ky festival të jetë më i miri ndonjëherë”, ka shtuar këngëtarja, tashmë drejtore artistike e Festivalit të Këngës në RTSH.
“Jam e lumtur që po filloj këtë udhëtim duke marrë mësime nga më të mirët në spektaklin e muzikës, si “San Remo”, direkt në selinë e RAI. Këto mësime të vlefshme do t’i sjell me vete në vendin tonë për të bërë më të mirën për festivalin tonë të dashur”, ka përfundar ajo, duke uruar të gjithë shqiptarët:
Na vaftë mbarë
