KRU Hidromorava vijon projektin e sanimit të rrjetit të dëmtuar dhe vjetëruar
KRU Hidromorava në Gjilan, gjatë javës së fundit ka zhvilluar një mori aktivitetesh, shumë prej të cilave ishin të lidhura me sanimin e rrjetit dhe ndërimin e pajisjeve të dëmtuara dhe të vjetëruara.
Fillimisht, ka pasur intervenime në disa zona në rrjetin e furnizimit të ujësjellësit: në Përlepnicë, Livoq i Ulët, Dobërqan, si dhe në rrugën “V. Vilson”.
Këto ndërprerje me furnizim kanë ndodhur me qëllim të sanimit të gjendjes për të siguruar që qytetarët të marrin shërbime sa më cilësore dhe furnizim të ujit pa ndërprerje.
Intervenime në rrjetin e ujësjellsit ka pasur edhe gjatë ditëve të mëpastajme, kryesisht në zonat e theksuara paraprakisht, në të cilat punimet kanë qenë në proces paraprak të sanimeve në rrjet.
“Në përgjithësi, për konsumatorët të zonave që i kemi cekur në njoftim, mund të ketë ndërprerje të shkurtëra të furnizimit me ujë, por përpjekjet tona janë për të siguruar që ju të merrni një shërbim sa më cilësor dhe furnizim të ujit pa ndërprerje”, thuhej në njoftim.
Kujtojmë që gjatë muajit mars të këtij viti, KRU Hidromorava ka përfituar nga një marrëveshje për financim të projekteve, që kapë shumën 12.4 milionë euro, në kuadër të të cilit janë mundësuar një sërë aktivitetesh infrastrukturore.
“Nënshkruhet marrëveshja për financimin 12 milionësh për KRU Hidromoravën. Ministri Murati, Ministri Aliu dhe Kryeshefi Ekzekutiv i KRU Hidromorava z. Ymer Salihu kanë nënshkruar sot marrëveshjen për kanalizimin e 12.4 milionë euro për KRU Hidromorava. Ky financim mundësohet përmes marrëveshjes “Nxitja dhe Levimi i Mundësive për Sigurinë e Ujit” me Bankën Botërore, dhe parasheh investime të ndryshme në fushën e ujërave dhe shërbimeve ujore”, thuhej në njoftimin zyrtarë të Ministrisë Ekonomisë në atë periudhë.
“Financimi do të përdoret për rehabilitimit dhe modernizimin e infrastrukturës kritike të sistemit të ujësjellësit Hidromorava. Përkatësisht, projekti mundëson blerjen, zëvendësimin dhe instalimin e pajisjeve që përmirësojnë efikasitetin e energjisë, zvogëlimin e humbjeve të ujit, si dhe vendosjen e kontrollit efikas mbi sistemet e ujësjellësit”, vijohej më tej në njoftim.
Ndërsa po aty theksohej se nënshkrimi i kësaj marrëveshje është tejet i rëndësishëm për regjionin e Anamoravës, pasiqë përforcon kapacitetet e KRU Hidromorava për menaxhimin e integruar të ujërave, përmirëson sigurinë e ujërave në pellgun e Moravës së Binçës, si dhe përmirëson shërbimet e ofruara për qytetarët nga KRU Hidromorava.
