Gjilan: Themelohet Grupi i Pavarur për Vetëqeverisje të Gjilanit
Gjilanit i shtohet një alternativë qeverisëse e së ardhmes, Grupi i Pavarur për Vetëqevrisje të Gjilanit, i cili është themeluar të shtunën, 30 shtator 2023.
Kjo nismë e Prof. Dr. Flamur Hyseni me bashkëpuntorë mëton të jetë një alternativ ndryshe, e cila, siç është paralajmëruar, do të marrë pjesë në zgjedhjet e ardhshme lokale, të parapara të mbahen në vitin 2025.
“Kemi një program të përbashkët me të gjithë anëtarët e grupit. Në ditët në vijim do të përpiqemi të krijojmë edhe strukturat e brendshme dhe aktet tjera normative të funksionimit të grupit dhe do të kemi një program konkret, të përcaktuar nga ekspertët e grupit si dhe ekspertët tjerë, të cilët kanë shfaqur interesim të bashkëpunojnë me këtë grup”, ka thënë në konferencën me gazetarë, ideatori e nismëtari i GPVGJ-së, Prof. Dr. Flamur Hyseni.
Grupi ka për synim që të orientohet në katër fusha kryesore të vetëqeverisjes:
- Në edukim, në të gjithë sektorët, nga ai parafillor deri te sektori fillor e i mesëm, që janë kompetencë e qeveriesjes komunale;
- Kulturë, rini e sport;
- Shëndetësi, që është gjithashtu kompetencë e komunës, dhe
- Zhvillimin Ekonomik lokal.
“Ne jemi bashkuar, rreth 30 persona, për të krijuar aktetet e punës, dhe për ta konsideruar të konstituuar grupin në momentin e nënshkrimit të këtij dokumenti deklarativ”, ka shtuar Dr. Flamur Hyseni.
Siç u potencua në konferencë, ekipi themelues i GPVGJ-së, është i përbërë nga kuadro të profileve të ndryshme, si: juristë, ekonomistë, mjekë, sportistë, si dhe personalitete tjera që kanë përvojë në qeverisje, siç është z. Sokol Haziri, një nga drejtorët e sukesesshëm në shërbimet publike në të kaluarën, e shumë tjerë.
