Mirlind Daku dikur, futbollist i shkollës “Abaz Ajeti”, në hapat e parë të karrierës
Mirtlind Daku, tashmë ylli i Kombëtares shqiptare, i cili shkëlqeu në ndeshjen e Shqipërisë ndaj Polonisë, pasi vendosi epilogun përfundimtar me golin e dytë të shënuar për kuqezinjtë, tashmë ka lënë gjurmë të theksuara, duke u përcjellur nga komuniteti i tërë i futbollit në kontinentin e vjetër e më gjërë!
Skepsa dhe vlerësimet se kinse Daku doli papritmas në sipërfaqe nuk qëndron pasi ai tanimë ka krijuar një karrierë të plotë nëpër disa skuadra të Superligës së Kosovës, duke shkëlqyer kudo, sikurse edhe nëpër skuadra të ligave të ndryshme në rajon e më gjërë, Kroaci, Slloveni e Russi te Rubin Kazan.
Karriera e tij një kohë kishte marrë tatëpjetën, porse fati deshi që ai të rikthehet në futboll tërësisht, madje në saje të rrethanave të çuditshme, për ç’gjë do të flasim një herë, pasi nuk është temë e këtij shkrimi.
Tema e këtij shkrimi ka të bëjë shkurtimisht me faktin se Mirlindi nuk ishte futbollist që u krijua rastësisht. Për këtë flasin qartë faktet. Një nga ato fakte është edhe ky, si në vijim: Ai ka mbaruar ciklin fillestar të shkollimit në lagjes ku jetoi, “Qenar Qeshme”, saktësisht shkollën “Abaz Ajeti” në Gjilani.
Në një foto të gjenduar e postuar në faqen zyrtare të kësaj shkolle, Daku shihet krahas mësimdhënësit të tij të Ed. Fizike, Ramiz Keka, në njërën nga garat e zhvilluara në Sallën e Sporteve “Bashkim Selishta – Petriti”, në Gjilan, mbase në kuadër të garave të shkollave të Gjilanit e më gjërë.
Nga ajo që shihet në foto, është e qartë se Daku merr instruksione për ndeshjen të cilën janë duke e zhvilluar, nga profesori Ramiz Keka, njëherit trajneri i tij.
Në deklaratat e atyre që e kanë njohur nga afër, thuhet se Mirlindi që atëherë kishte paralajmëruar për një karrierë të bujshme prej futbollisti të niveleve të larta, por gjithnjë ishte supozuar të jetë një futbollist i niveleve të ligës së Kosovës, apo edhe ligave të rajonit, porse asokohe nuk ishte besuar se do të bëhet një futbollist i rangut europian.
Në fakt Daku tanimë e dëshmuar dhe po vazhdon ta dëshmoj një gjë të tillë, dhe progresi që është duke bërë në vazhdimësi, nëpër paraqitjet e tij kudo që luan, e argumentojnë qartë se ai së shpejti do të jetë një futbollist i ndonjërës prej ligave më të forta europiane!
