Papa Françesku takohet me viktimat e abuzimit seksual nga priftërinjtë
Papa Françesku ka mbajtur një takim privat me viktimat e abuzimit seksual nga klerikët fetarë, në kuadër të vizitës pesëditore që po zhvillon në Portugali.
Në muajin shkurt, një komision, i ngjashëm me komisionet e auditimit që ekzistojnë në Evropë dhe Amerikë, publikoi një analizë të rasteve që datojnë prej vitit 1950.
Sipas raportit të paktën 4.815 fëmijë ishin abuzuar seksualisht në Portugali nga priftërinjtë apo zyrtarë tjerë të Kishës, dhe Kisha kishte tentuar vazhdimisht t’i fshihte si raste.
Teksa prezantoi gjetjet, psikiatri i fëmijëve Pedro Strecht, tha se vlerësimi përfaqëson “minimumin absolut” të rasteve dhe se shifrat janë vetëm “maja e ajsbergut”.
Në një meshë të mbajtur në mbrëmje në Lisbonë, Papa tha se Kisha duhet ta dëgjojë “vajin e viktimave”. Ai shtoi se skandali na drejton kah “pastrimi i vazhdueshëm”, dhe se rritja e zemërimit ka kontribuuar në shkëputje më të madhe të praktikimit të fesë.
Papa, 86 vjeç ndodhet në Portugali për të kremtuar Ditën Botërore të Rinisë, e cila është krijuar më 1986 nga Papa Xhon Pali II dhe është tubimi më i madh në botë i katolikëve, që shënohet përmes ngjarjeve të ndryshme, përfshirë koncerte dhe sesione të lutjesh.
Gazetar Artur Mata
/ rtsh /
