“Ankaraja po armatos intensivisht Kosovën”, Serbia i dërgon notë proteste ambasadorit turk
Serbia i ka dorëzuar ambasadorit të Turqisë atje një notë proteste, pasi Kosova ka blerë Bayraktar TB-2 nga Turqia, që tashmë kanë mbërritur dhe janë pjesë e arsenalit të FSK-së.
Shteti serb pretendon se “Turqia po punon intensivisht në armatosjen e Kosovës”, transmeton gazeta online Reporteri.net.
“Ne po përdorim të gjitha kanalet në dispozicion për të paralajmëruar Turqinë se kjo është e papranueshme dhe shqetësuese për ne”, tha Sekretari i Shtetit, Nemanja Staroviq.
“Kryeministri i Kosovës Albin Kurti prezantoi publikisht mjetet ajrore pa pilot dhe të gjithë janë të vetëdijshëm për faktin se Turiqa po rrit kapacitetet e forcave të Kosovës me donacionet e armëve sulmuese, armë tanke, mortaja dhe një armë tjetër”, tha Staroviq për RTS.
Sipas tij, kjo “ngre nivelin e rrezikut dhe kërcënimeve siç pretendon ai, ndaj popullatës serbe në Kosovë por edhe ndaj Serbisë në tërësi”.
“Kjo është veçanërisht shqetësuese sepse Turqia do të marrë përsipër komandën e KFOR-it në vjeshtë, për herë të parë që nga themelimi i këtij misioni. Kjo nuk është e mirë, ne nuk mund të ndikonim në atë vendim sepse është ekskluzivisht në kompetencë të aleancës së NATO-s”, tha Staroviq.
Ai deklaroi se emërimi i një gjenerali nga Turqia si komandant i KFOR-it sjell “sfida shtesë”. /Reporteri.net/
