Gjilan: Drejtoresha e Arsimit uron maturantët: – “kushtoni rëndësi zgjedhjes profesionit, mos i harroni mësuesit, shihni para me guxim”
Drejtoresha e DKA-së në Gjilan, Albana Demiri, përmes një mesazhi në faqen e këtij institucioni, u është drejtuar nxënësve maturantë nga Komuna e Gjilanit, në të gjitha shkollat e qytetit e gjetiu me një urim për të ardhmen e tyre profesionale, duke i porosituur që t’i rreken pa ngurrim sfidave dhe vështirësive nëpër të cilat do t’i dërgoj e ardhmja.
“Dëshiroj t’iu përgëzoj për përfundimin me sukses të një tjetër moment historik jetësor. Shpresoj të keni marrë sasinë e njohurive që ju nevojiten, të cilat patjetër do t’iu vijnë në ndihmë gjatë jetës. Mundohuni t’i kushtoni më shumë vëmendje zgjedhjes së profesionit dhe mos harroni miqtë dhe mësuesit tuaj të shkollës. Shkoni në rrugën tuaj, duke parë me guxim përpara dhe mos kini frikë nga vështirësitë!”, ka uruar ajo.
Drejtoresha e DKA-së, ka falënderuar njëherit menaxhmentin e shkollës së muzikës, për të cilin ka thënë se janë shprehur të gatshëm të përgatisin program të larmishëm artistik/muzikor, për mbrëmjen e maturës së tyre.
“Falënderime të sinçerta për drejtorin e Shkollës së Muzikës, Kushtrim Jakupi, i cili na mbështeti për këtë ide; falënderime edhe për profesorët tanë të cilët me vullnetin e tyre shprehën gatishmëri për të ofruar muzikë të mrekullueshme për ju maturantë të dashur. Për fund dua t’u uroj maturi dhe forcë për rritjen e mëtejme. Jeta u dhuroftë surpriza të këndshme, rruga juaj qoftë e lehtë dhe me diell. Ju uroj lumturi, ditë të mira, shëndet të mirë dhe një fener të ndritshëm përpara që do t’iu ndihmoj të bëni zgjedhjen e duhur”, ka thënë ajo.
