AGK i quajti të rrezikshme deklaratat e tij, Vela: Reagimi im ka të bëj me shpërndarësit e dezinformatave
Pasi Asociacioni i Gazetarëve të Kosovës (AGK) e cilësoi si të rrezikshme dhe të papranueshme gjuhën e përdorur ndaj mediave nga Shefi i Stafit të Presidentes Osmani, Blerim Vela, ka reaguar sërish ky i fundit.
Vela ka thënë se reagimi i tij nuk ka të bëjë me mediat, por me shpërndarësit e dezinformatave.
“Media të nderuara, reagimi im ka të bëj me shpërndarësit e dezinformatave, porse jo me mediat, të cilat e kanë të drejtën e tyre për raportim të lirë”, ka shkruar Vela në Tëitter.
Ai tutje ka thënë se mediat e lira janë themel i demokracisë, ndërsa ka shtuar se “i inkurajoj që ta zbërthejnë më tej kush janë porositësit e dezinformatave”.
Ndryshe, AGK-ja në reagimin e saj publik të enjten tha se nuk është hera e parë që Vela sulmon mediat e Kosovës.
“Vela në një postim skandaloz në Twitter, thotë se raportimet e mediave të Kosovës ‘janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhën në listën e zezë të SHBA-së. Kjo është një gjuhë e papranueshme dhe shumë e rrezikshme që rëndon ambientin e punës së gazetarëve në Kosovë. Për më tepër është vazhdimësi e sulmeve të zotit Vela ndaj mediave”, thuhet në reagimin e AGK-së.
