Shefi i kabinetit të Gërvallës për fotografinë në klub të striptizit: Këlyshët e Pronto-s po përhapin lajme të rreme
Shefi i Kabinetit të ministres së Punëve të Jashtme dhe Diasporës, Donika Gërvalla, Sharr Jakupi, është parë në një fotografi, ku raportohet se ka qenë në një klub të striptizit në Tajlandë.
E këtë lajm dhe fotografi të tijën, s’e ka lënë pa e komentuar edhe vetë Jakupi, për të cilën tha se “Këlyshët e klanit Pronto po përhapin sërish lajme të rreme”, duke aluduar në portalin i cili ka publikuar fotografinë në fjalë.
Jakupi ka pranuar në Facebook se është ai personi që shihet në fotografi, por tha se aty kla qenë në pushime private në Tajlandë.
“Përmes këtij postimi dua të demantoj artikullin që po qarkullon në disa media online lidhur me një fotografi ku shihem unë në një club nate gjatë pushimeve private që kam kaluar në Tajlandë”, ka shkruar Jakupi.
Tutje, ai ka theksuar se këto lajme po bëhen me tendenca për ta prishur reputacionin e tij.
“Dua të theksoj që aludimet e mediave duke filluar nga lloji i club-it e deri tek pjesa që ka mundur të jetë vizitë zyrtare, janë të pavërteta dhe me tendencë të prishin reputacionin tim si individ, profesionist dhe zyrtar shtetëror”, ka përfunduar shefi i kabinetit të Gërvallës./Arbresh.info/
