Reagon Ministri i MKRS-së,Hajrullah Çeku, pas djegies së godinës së shkollës “Ismail Qemali” në Ferizaj
Në një postim në faqen e tij në facebook, ministri i MKRS-së, Hajrullah Çeku ka reaguar ashpër pas zjarrit që ka kapluar një pjesë të objektit të Gjimnazit të Vjetër “Ismail Qemali” në Ferizaj.
Ai e ka cilësuar krim djegien e objektit, ndërsa ka apeluar te organet e drejtësisë që të zbardhin rastin sa më parë dhe përgjegjësitë të dalin para drejtësisë.
“Kontratën për restaurimin e gjimnazit të vjetër e patëm nënshkruar javën e kaluar. Dje kanë nisur punimet, ndërsa sot në orët e para të mëngjesit ia vunë flakën. Ky është krim. Përgjegjësit duhet të përballen me drejtësinë”, tha ministri MKRS-së, Hajrullah Çeku.
Ministri Çeku është shprehur konsistent në vendimin e institucionit që drejton për restaurimin e objektit të Gjimnazit “Ismail Qemali”, duke adresuar një mesazh për akterët e përfshirë në veprimet e zjarrëvënies.
“Gjimnazi i vjetër “Ismail Qemali’ në Ferizaj do të restaurohet, i pëlqeu apo jo keqbërësve. Trashëgimia jonë kulturore është më e rëndësishme se interesat tuaja të ngushta. Metodat e porositë mafioze nuk na ndalin”, ka shkruajtur Çeku.
