Ukraina fituese ne Eurovision 2022!
Ukraina ka fituar Eurovision 2022, me këngën “Stefania”. Grupi Kalush Orchestra ka marrë numrin më të madh të votave të publikut, plot 439 pikë, duke kaluar menjëherë në vendin e parë.
Votat e jurisë profesioniste shkuan për Mbretërinë e Bashkuar, por rezultati u përmbys nga votat e publikut.
Kalush Orchestra – përfaqësuesi i Ukrainës në Eurovizion 2022 – ka prekur telat e zemrës, edhe pse pak e kuptojnë tekstin. Këngëtari Oleh Psiuk repon për nënën e tij Stefania – personazhi kryesor i këngës – dhe lavdëron duart e saj të forta që e inkurajuan atë në kohë të mira dhe të këqija. E shkruar para pushtimit të Ukrainës nga Rusia, kënga ka marrë një kuptim të ri tani në kohën e luftës. Tani lexohet si Nënë Ukraina që mbron fëmijët e saj në të njëjtën kohë që ata përpiqen ta mbrojnë atë.
Kënga folk-rep në gjuhën ukrainase nuk ka asnjë anglisht. Por shikuesit mund ta kuptojnë se “mamo” – e përsëritur në kor – do të thotë nënë. Inskenimi e bën të dukshme dhimbjen që përmban kënga. Në ekranin LED shohim sy të mëdhenj, të përlotur nga pranvera e humbur, dhe në dyshemenë LED duar të rrudhosura – një nënë që përqafon fëmijët e saj në momentin e tyre më të vështirë.
