Malisheva mposht me rezultat të thellë Trepçën ’89, Sermaxhaj përgëzon lojtarët e tij
Malisheva ka arritur të marrë një fitore të madhe ndaj Trepçës ’89, pasi e ka mposhtur me rezultat të pastër 4-0.
Pjesa e parë përkundër rasteve të mira që patën dy skuadrat nuk prodhoi gola dhe u mbyll me rezultat të pastër 0-0.
Por në pjesën e dytë Malisheva u tregua shumë konkrete në rastet që i pati, duke realizuar dy gola brenda dy minutave.
Ishte sulmuesi Ronald Sobowale që kaloi vendasit në epërsi me golin e shënuar në minutën e 59-të për 1-0.
Vetëm dy minuta më vonë vendasit gjetën edhe golin e dytë, kur shënoi autogol mbrojtësi i mysafirëve Fatmir Rexheaj për 2-0.
Për 3-0 u përkujdes Alban Shillova që shënoi nëminutën e 84-të për 3-0.
E në minutën e 90-të, vendasit gjetën edhe golin e katërt dhe të nokautit për mysafirët. Behar Maliqi u gjend bukur në zonë dhe nga afërsia realizoi për rezultatin përfundimtar 4-0.
Trajneri i malishevasve, Samir Sermaxhaj ka mbetur shumë i lumtur me fitoren e skuadrës së tij në këtë sfidë.
“Kemi pritur se do të jetë ndeshje e vështirë. Përgëzoj djemtë për disiplinën e madhe taktike, për presingun që ishte mirë i organizuar nga lojtarët. Epilogu final është si rezultat i dy golave të parë. Trepça ’89 bëri ndryshime të disa lojtarëve, ndërsa lejoi hapësira. I përgëzoj djemtë për angazhimin dhe disiplinën taktike”, tha fillimisht Sermaxhaj. Këto tri pikë janë shumë të rëndësishme pasi fituam në shtëpi. Tani kemi sfidë të vështirë dhe këto tri pikë harrohen për ndeshjen e radhës”, deklaroi Sermaxhaj.
Trajneri mitrovicas, Shpëtim Idrizi ka thënë pas ndeshjes se ka mbetur i zhgënjyer pasi asgjë nuk funksionoi në këtë sfidë.
“Të them të drejtën jo vetëm mbrojtja, por nuk funksionoi asgjë. Pjesa e parë ishte e baraspeshuar dhe ishim pak më mirë se Malisheva”. Në pjesën e dytë ndryshoi gjithçka. Nuk shfrytëzuam një mundësi që kishim me Gashin dhe më pas asgjë nuk shkoi mirë për ne”.
Me këtë fitore Malisheva ngjitet në vendin e gjashtë në tabelë me 15 pikë, derisa 89-shi mbetet e nënta me 11 sosh.
Ndeshjen e ardhshme Malisheva e luan në udhëtim te Dukagjini, derisa Trepça ’89 pret Drenicën.
